- अविरत वाटचाल न्यूज नेटवर्क
- नवी मुंबई, 23 जून 2025
नवी मुंबई महानगरपालिकेचे ऐरोली येथील भारतरत्न डॉ. बाबासाहेब आंबेडकर स्मारक तेथील अत्याधुनिक इ लायब्ररी सुविधेसह समृद्ध ग्रंथालय आणि तेथे नियमितपणे होणाऱ्या ‘विचारवेध’ आणि ‘जागर’ या व्याख्यानशृंखला यामुळे अल्पावधीतच ‘ज्ञानस्मारक’ म्हणून देशभरात नावाजले जात आहे. अनेक नामांकित व्याख्यात्यांनी त्या ठिकाणी येऊन विविध विषयांवर आपली विचारधारा प्रकट केली आहे.
याच व्याख्यानांच्या मांदियाळीत 26 जून रोजीच्या राजर्षी छत्रपती शाहू महाराज जयंतीचे औचित्य साधून मंगळवार, 24 जून रोजी, सायं. 6.30 वा. सुप्रसिद्ध व्याख्याते प्रा.गोपाल गुरु यांचे ‘राजर्षी छत्रपती शाहू महाराज आणि डाॅ. बाबासाहेब आंबेडकर यांचा शिक्षण विषयक आधुनिक दृष्टिकोन’ या विषयावरील व्याख्यान भारतरत्न डॉ. बाबासाहेब आंबेडकर स्मारक येथील सभागृह, ऐरोली मुलुंड खाडी पुलाजवळ, सेक्टर 15, ऐरोली येथे आयोजित करण्यात आले आहे.
हे वाचा : इमारतींची पडझड आणि उदासिनता
‘इकॉनॉमिक अँड पॉलिटिकल विकली’ या नियतकालिकाचे संपादक असलेले प्रा.गोपाल गुरु राज्यशास्त्राचे नामांकित अभ्यासक, प्राध्यापक आणि लेखक आहेत. सामाजिक न्याय आणि समता या विचारधारेवर सर्वस्पर्शी लेखन करणारे नामवंत व्याख्याते प्रा. गोपाल गुरु यांच्या व्याख्यानाप्रसंगी नागरिकांनी मोठ्या संख्येने उपस्थित राहावे असे आवाहन करण्यात येत आहे.
========================================================
