मोठया प्रमाणातील इनकमिंगमुळे शिवसेनेत उत्साह
- सिध्दार्थ हरळकर/ अविरत वाटचाल
- नवी मुंबई, 11 जानेवारी 2026
नवी मुंबई महानगरपालिका निवडणुकीची रणधुमाळी शेवटच्या टप्प्यात आली आहे. नवी मुंबईत भाजप विरुद्ध शिवसेना अशी लढत म्हटली तरी झूंज ही प्रामुख्याने भाजपचे ज्येष्ठ नेते गणेश नाईक आणि शिवसेना (शिंदे गट) पक्षाचे प्रमुख आणि उपमुख्यमंत्री एकनाथ शिंदे यांच्यात होणार असल्याचे आता जगजाहीर झाले आहे. राज्याच्या सत्तेत एकत्र असूनही दोन्ही नेते आता एकमेकांविरोधात उभे ठाकले गेल्याने दोन्ही नेत्यांच्या शिलेदारांनी ही निवडणूक प्रतिष्ठेची केली आहे. नवी मुंबईत सर्वाधिक नगरसेवक राहिलेल्या गणेश नाईक यांच्या नेतृत्वाखालील भाजपला शिवसेना काटे की टक्कर देणार असे चित्र सध्या दिसत आहे.
शिंदे गट शिवसेनेचा विचार करता त्यांच्याशी ही लढत म्हणजे अस्तित्वाची ठरणार आहे. शिवसेना पक्षाचे प्रमुख आणि राज्याचे उपमुख्यमंत्री एकनाथ शिंदे यांनी मोठी ताकद नवी मुंबई काबीज करण्यासाठी लावली आहे. त्यासाठी एकेकाळचे गणेश नाईक यांचेच खंदे समर्थक राहिलेल्या आणि सध्या शिवसेनेचे उपनेते असणाऱ्या विजय चौगुले आणि बेलापूर विधानसभा मतदार संघातील ज्येष्ठ नगरसेवक आणि पक्षाचे जिल्हाप्रमुख किशोर पाटकर यांच्या खांद्यावर प्रामुख्याने निवडणुकीची भिस्त आहे.
बेलापूर विधानसभा मतदार संघाचा विचार करता ज्येष्ठ नगरसेवक आणि पक्षाचे जिल्हाप्रमुख किशोर पाटकर यांनी इतर पक्षांतील नाराजांची मोट बांधत शिंदे गटाचे हात अधिक बळकट केले आहेत. एकनाथ शिंदे यांचे कट्टर समर्थक असणाऱ्या किशोर पाटकर यांच्यावर इतर उमेदवारांना जिंकून आणण्याची मोठी जबाबदारी आहे आणि ते यशस्वी करून दाखवतील, असा विश्वास पक्षाचे प्रमुख आणि उपमुख्यमंत्री एकनाथ शिंदे यांनी व्यक्त केलेलाच आहे.
नवी मुंबईतील मोडकळीस आलेल्या जून्या इमारतींच्या पुनर्विकासाचा प्रश्न किशोर पाटकर यांनी प्रारंभीपासून लावून धरला आहे. शिवाय शहरातील वाढती लोकसंख्या, नवी मुंबई आंतरराष्ट्रीय विमानतळामुळे होणारा विकास तसेच वाहतुक व्यवस्थेवर पडणारा ताण यामुळे मेट्रो सेवेची निकड याबाबत किशोर पाटकर कमालीचे आग्रही आहेत. शहरातील नागरिकांचे जीवनमान उंचावण्यायासाठी सगळ्यात महत्वाची गोष्ट असणाऱ्या आरोग्य सेवा, शिक्षण यावर पाटकर यांचा अधिक भर आहे.
दुसरीकडे ऐरोली विधानसभा मतदार संघात विजय चौगुले यांना मानणारा मोठा वर्ग आहे. विजय चौगुले यांनी या मतदार संघातून विधानसभा निवडणूक लढविली असल्याकारणाने इथल्या राजकारणाची चांगलीच माहिती आहे. शिवाय भाजपमधील अनेक नाराज तसेच शिवसेना उबाठामधील अनेकांना विजय चौगुले यांनी पक्षात दाखल करून घेतल्यामुळे शिवसेना शिंदे गटाची ताकद वाढली आहे.
शिवसेना शिंदे गटात मोठ्या प्रमाणात इनकमिंग
ऐन निवडणुकीच्या धामधुमीत सगळ्यात जास्त इनकमिंग कोणत्या पक्षात झाले असेल तर ते शिवसेना शिंदे गटाचे नाव घेतले जाते. नवी मुंबईचा विचार करता राष्ट्रवादी काँग्रेस अजित पवार गटाचे नवी मुंबई जिल्हाध्यक्ष नामदेव भगत आणि त्यांचे समर्थक, नवी मुंबई काँग्रेस जिल्हाध्यक्षा पुनम पाटील आणि त्यांचे समर्थक, काँग्रेस इंटकचे नवी मुंबई अध्यक्ष रविंद्र सावंत, शिवसेना उबाठा गटाचे एम.के.मढवी आपल्या कुटुंबियांसह, भाजपचे दत्ता घंगाळे, काँग्रेसचे माजी उपमहापौर अविनाश लाड, माजी ज्येष्ठ नगरसेविका विद्या गायकवाड, शिवसेना उबाठा गटाचे माजी नगरसेवक दाम्पत्य वास्कर तसेच इतर पक्षातील असंख्य पदाधिकारी आणि कार्यकर्त्यांनी मोठय़ा संख्येने शिवसेना शिंदे गटात प्रवेश केल्यामुळे पक्षाची ताकद कित्येकपटीने वाढली आहे.
क्लिक करा : ज्येष्ठांच्या मक्तेदारीने नवोदितांची गोची
दरम्यान, नवी मुंबईत दिर्घकाळ वर्चस्व राखणाऱ्या गणेश नाईक यांच्या नेतृत्वाखाली भाजपची मंडळी आपापल्या जागा राखण्यात यशस्वी झाली तरी महापालिकेवर भाजपचा झेंडा फडकेल, असे राजकीय जाणकारांचे म्हणणे आहे. मात्र पक्षातर्फे उमेदवारी देताना पक्षाच्याच बेलापूरच्या आ. मंदा म्हात्रे यांच्या समर्थकांना उमेदवारी न मिळाल्यामुळे त्या नाराज झाल्या असल्याचे बोलले जाते. त्याचा परिणाम अनेकांनी पक्षाला सोडचिठ्ठी देत इतर पक्षांकडे आपला मोर्चा वळविला. अशा परिस्थितीत नाराजांचे समाधान करून विजयाची पताका फडकविण्यास भाजप नेते गणेश नाईक आपला सारा अनुभव पणाला लावतील. म्हणूनच नवी मुंबईतील खरी लढत या दोन मात्तब्बर नेत्यांमध्ये असली तरी या साऱ्याची भिस्त त्यांच्या शिलेदारांवर असणार हे नक्की.
