सर्वोच्च न्यायालयाकडून चारही नराधमांच्या फाशीची शिक्षा कायम
नवी दिल्ली, 5 मे 2017:
संपूर्ण देशात खळबळ माजवणाऱ्या दिल्लीतील निर्भया बलात्कार प्रकरणातील आरोपींची फाशी सर्वोच्च न्यायालयाने आज कायम ठेवली. यावेळी न्यायालयात उपस्थित असलेल्यांनी टाळ्या वाजवून न्यायालयाच्या निकालाचे स्वागत केले.
16 डिसेंबर 2012 रोजी दिल्लीत धावत्या बसमध्ये एका तरुणीवर अतिशय अमानुषपणे अत्याचार करण्यात आला होता. या भयानक घटनेने देशात एकच खळबळ उडाली होती. पिडीत मुलीचा दुःखद मृत्यु झाल्यानंतर देशभरात संतापाची लाट उसळली आणि आरोपींविरोधात जनक्षोभ भडकला. या भयानक गुन्ह्यातील आरोपी मुकेश, अक्षय, पवन आणि विनय यांना मृत्यूदंडाची शिक्षा द्यावी, अशी मागणी देशभरातून करण्यात आली होती. या गुन्ह्याचे गांभिर्य लक्षात घेवून जलदगती न्यायालयानेदेखील सर्व आरोपींना फाशीची शिक्षा ठोठावली होती. या शिक्षेवर 14 मार्च 2014 रोजी दिल्ली उच्च न्यायालयानेदेखील शिक्कामोर्तब केले होते. या शिक्षेविरोधात सर्व आरोपींनी सर्वोच्च न्यायालयात धाव घेतली होती.सर्वोच्च न्यायालयातही हा खटला जलदगतीने चालविण्यात आला. आज दुपारी 2 च्या सुमारास तीन न्यायाधीशांच्या खंडपीठाने 20 मिनिटांत निकाल देत चारही आरोपींची फाशीची शिक्षा कायम ठेवली.
निर्भया बलात्कार प्रकरणात सहा आरोपी होते. त्यापैकी एक आरोपी राम सिंह याने आत्महत्या केली होती. तर एका अल्पवयीन आरोपीची सुधारगृहातील 3 वर्षांची शिक्षा भोगल्यानंतर सुटका झाली आहे. उर्वरित चारही आरोपींची फाशीची शिक्षा सर्वोच्च न्यायालयाने कायम ठेवली आहे.
निर्भया प्रकरणाचा घटनाक्रम
- 16 डिसेंबर 2012 रोजी चालत्या बसमध्ये तरुणीवर अमानुषपणे सामूहिक अत्याचार
- 18 डिसेंबर 2012 रोजी राम सिंह, मुकेश, विनय शर्मा, पवन गुप्ता यांना अटक
- 21 डिसेंबर 2012 रोजी पाचव्या अल्पवयीन आरोपीला अटक
- 22 डिसेंबर 2012 रोजी सहाव्या आरोपीला अटक
- 26 डिसेंबर 2012रोजी निर्भयाला उपाचारासाठी सिंगापुरला नेण्यात आले.
- 29 डिसेंबर 2012 रोजी निर्भयाचे दुखद निधन झाले.
- 3 जानेवारी 2013 रोजी फास्ट ट्रॅक कोर्टात पाच आरोपींविरोधात आरोपपत्र दाखल
- 28 फेब्रुवारी 2013 रोजी अल्पवयीन आरोपीवर आरोप निश्चित
- 11 मार्च 2013 रोजी आरोपी राम सिंहने आत्महत्या केली.
- 31 ऑगस्ट 2013 रोजी अल्पवयीन आरोपीलाही दोषी जाहीर
- 10 सप्टेंबर 2013 रोजी अन्य चारही आरोपी दोषी जाहीर
- 13 सप्टेंबर 2013 चारही आरोपींना फाशीची शिक्षा
- 7 ऑक्टोबर 2013 मध्ये शिक्षेविरोधात दिल्ली उच्चन्यायालयात अपील
- १३ मार्च २०१४ रोजी उच्च न्यायालयाने फाशीची शिक्षा कायम ठेवली
- १५ मार्च २०१४ रोजी आरोपींचे सर्वोच्च न्यायालयात अपील
- २० डिसेंबर २०१५ रोजी अल्पवयीन आरोपीची तीन वर्षांच्या शिक्षेनंतर सुटका
- २७ मार्च २०१७ रोजी सर्वोच्च न्यायालयाने निर्णय राखून ठेवला
- ५ मे २०१७ रोजी सर्वोच्च न्यायालयाकडून चारही आरोपींची फाशीची शिक्षा कायम
