- अविरत वाटचाल न्यूज नेटवर्क
- नवी मुंबई, 6 मार्च 2026
नवी मुंबई महापालिकेचे वैद्यकीय आरोग्य अधिकारी डॉ. प्रशांत जवादे हे नियत वयोमानानुसार महापालिकेच्या सेवेतून निवृत्त झाल्यानंतर रिक्त झालेल्या जागेवर अद्याप कुणाचीही नेमणूक झालेली नाही. प्रशासन विभागाने नव्या नियुक्तीबाबतचा प्रस्ताव तयार करून महापालिका आयुक्तांकडे पाठवला आहे. मात्र आयुक्तांनी अद्याप नव्या वैद्यकीय आरोग्य अधिकाऱ्याची नेमणूक जाहीर न केल्यामुळे महापालिका वर्तुळात चर्चेला ऊत आला आहे.
नवी मुंबई महानगरपालिकेच्या महासभेत सत्ताधारी भाजपने महापालिका कर्मचाऱ्यांचे वय ५८ वरून ६० वर्षे करण्याचा प्रस्ताव मांडून तो बहुमताने मंजूर केला.मात्र राज्य शासनाने नियमांकडे बोट दाखवून महापालिकेचा निवृत्ती वय वाढविण्याचा प्रस्ताव निलंबित केल्याची माहिती महापालिका आयुक्तांनी सभागृहात दिली. त्यामुळे मार्चमध्ये निवृत्त होणाऱ्या कर्मचाऱ्यांना सभागृहाच्या निर्णयाचा फायदा मिळालेला नाही आणि डॉ. प्रशांत जवादे यांना नियमानुसार सेवानिवृत्त व्हावे लागले.
डॉ.जवादे यांच्याजागी नियमानुसार ऐरोली येथील महापालिका रुग्णालयातील वरिष्ठ डॉक्टर रविंद्र म्हात्रे यांची नेमणूक अपेक्षित असल्याचे समजते. याबाबतचा प्रस्तावही आयुक्तांकडे पाठविल्याचे सूत्रांनी सांगितले.
त्यातच आता वाशी येथील महापालिका रुग्णालयातील डॉ. राजेश म्हात्रे यांच्याही नावाची चर्चा सुरु झाल्यामुळे महापालिका आयुक्त कोणाच्या नावावर शिक्कामोर्तब करणार याकडे लक्ष लागले आहे.
========================================================
