ज्येष्ठ कवी, लेखक, चित्रकार अमोल ठाकुरदास यांचे अल्पशा आजाराने आकस्मिक निधन
- अविरत वाटचाल न्यूज नेटवर्क
- मुंबई, 12 ऑक्टोबर 2025
प्रसिद्ध गीतकार, लेखक, दिग्दर्शक, संगीतकार, चित्रकार, व्हिज्युअलायजर,पत्रकार आणि अध्यात्मिक सल्लागार अशा विविध क्षेत्रात यशस्वी कारकीर्द असलेले हरहुन्ननरी कलावंत श्री अमोल चंद्रकांत ठाकुरदास यांचे 8 ऑक्टोबर 2025 रोजी अल्पशा आजाराने मुंबईतील एका रुग्णालयात आकस्मिक निधन झाले. ते 54 वर्षांचे होते. त्यांच्यामागे पत्नी श्रीमती विशाखा ठाकुरदास आणि मुलगी कुमारी कार्तिकी ठाकुरदास असा परिवार आहे.
अमोल ठाकुरदास यांच्या अकाली निधनाबद्दल विविध क्षेत्रातील मान्यवरांनी समाज माध्यमांवर आपले दुःख व्यक्त करत त्यांच्या सोबत लाभलेला सुखद आणि ज्ञानपूर्ण सहवासही सविस्तररित्या मांडला आहे. तसेच कलाक्षेत्राची मोठी हानी झाल्याची भावनादेखील व्यक्त केली आहे.
जे.जे. कला महाविद्यालयातून त्यांनी आपले शिक्षण पूर्ण केले. तसेच मुंबईच्या सेंट झेविअर्स कॉलेजमधून फिल्म एण्ड प्रॉडक्शनचेही शोस्रोक्त शिक्षण घेतले.
अमोल ठाकुरदास यांनी VA (व्हि.ए.) नावाची जाहिरात कंपनी स्थापन केली. त्या कंपनीच्या माध्यमातून अमोल ठाकुरदास आणि त्यांच्या पत्नी विशाखा ठाकुरदास यांनी विविध उपक्रम यशस्वीपणे राबविले. विशेषतः पप्पूज मोटेल, मालवणी कट्टा अशा रेस्टॉरंटचे ब्रॅंडिंग आणि कॅंपेनिंग केले होते. तसेच ठाण्यातील ठाणे वार्ता या न्यूज चॅनलसाठी विविध उपक्रमही राबविले होते.
कलाक्षेत्रातील पदार्पणातच बाणगंगा या चित्रफितीपासून त्यांच्या चित्रपट कारकीर्दीची सुरुवात झाली. इन मुंबई चॅनलपासून छोट्या पडद्यावरील कारकिर्दीला सुरवात करणाऱ्या अमोल ठाकुरदास यांनी इटीसी न्यूज चॅनलच्या माध्यमातून दूरदर्शनवर प्रसारीत होणाऱ्या सारांश आणि मागोवा या वृत्तविषयक कार्यक्रमांसाठी मेहनत घेतली होती.
ई टीव्हीर दिर्घकाळ चाललेल्या आणि प्रेक्षकांच्या मनात घर करून राहिलेल्या भाग्यविधाता या मालिकेच्या काही भागांचे लेखनही त्यांनी केले होते.
यमाईच्या नावाने चांगभल या चित्रपटासह अनेक मराठटी आणि हिंदी चित्रपटांसाठी त्यांनी लेखन केले. तसेच तांत्रिक बाबीही सांभाळल्या होत्या.
सुपरस्टार शाहरुख खान यांच्या मै हू ना या चित्रपटासाठी त्यांनी सहाय्यक कला दिग्दर्शक म्हणून काम पाहीले होते.
हिंदी सोनी टिव्हीवरील अनेक मालिकांचे प्रमोशनल एडिटिंग, व्हॉइस ओव्हर केले आहे. तसेच 2015 ते 2017 या कालावधीत सोनी टिव्हीवरील क्राइम पेट्रोल या गुन्हेगरी विषयावरील मालिकांच्या काही भागांचे लेखन, पटकथा तसेच संवाद लेखन केले होते.
अमोल ठाकुरदास यायंनी औद्योगिक क्षेत्रातील अनेक कंपन्यांसाठी आंतरराष्ट्रीय प्रदर्शनात दाखवण्यासाठी व्यावसायिक शॉर्ट फिल्म्सची निर्मितीही केली होती.
दूरदर्शनवरील अत्यंत गाजलेल्या माझी माय या मालिकेचे शीर्षकगीत अमोल ठाकुरदास यांनी लिहिले होते. ते गाणे आजही प्रेक्षकांच्या मनावर राज्य करीत आहे. याशिवाय दूरदर्शनवरील अनेक कार्यक्रमांच्या निर्मितीमध्ये त्यांचा मोठा सहभाग होता.
महिंद्रा वेरिटो या गाडीच्या जाहिरातीचे लेखन तसेच दिग्दर्शनाचे काम त्यांनी केले.
अगस्ती एन्टरप्रायजेस या कंपनीसोबत काम करताना अमोल ठाकुरदास यांनी नवी मुंबई महानगरपालिकेच्या माझी वसुंधरा या पर्यावरण संदेश देणाऱ्या चित्ररथाच्या निर्मितीत मोठे योगदान दिले.
सन 2021-22 च्या सुमारास नवी मुंबईत पार पडलेल्या आंतरराष्ट्रीय महिला विश्वचषक फुटबॉल स्पर्धेसाठी तसेच आशियाई देशांच्या एएफसी महिला फुटबॉल स्पर्धेसाठी प्रचार रथ निर्मितीसह मराठी आणि हिंदी गाणी लिहिली होती. याशिवाय नवी मुंबई महापालिका निवडणुकीनिमित्त जनजागृतीसाठी जिंगल्सची निर्मिती केली होती. या कामांची सर्वच वर्तमापत्र तसेच विविध प्रसारमाध्यमांनी दखल घेतली होती.
अविरत वाटचाल न्यूज नेटवर्कच्या उभारणीत अमोल ठाकुरदास यांचा मोठा वाटा आहे. अविरत वाटचालच्या लोगोची संकल्पना आणि आरेखन त्यांच्याच कल्पनेतून साकारले आहे. तसेच अविरत वाटचालसाठी वेळोवेळी मार्गदर्शकाच्या भूमिकेत त्यांनी कायमच सहभाग घेतला होता.
अविरत वाटचाल वर्तमानपत्रात विविध क्षेत्रातील मान्यवरांच्या मुलाखती वजा वाटचालीचा वेध घेणारे विशेष सदरही त्यांनी चालविले. तसेच गप्पा इन्फॉर्मल या त्यांच्या यु ट्युब चॅनलच्या माध्यमातून अमोल ठाकुरदास यांनी विविध क्षेत्रातील मान्यवरांच्या मुलाखतीचा कार्यक्रमही चालविला.
