- अविरत वाटचाल न्यूज नेटवर्क
- नवी मुंबई, 17 डिसेंबर 2025:
राज्य निवडणूक आयोगामार्फत नवी मुंबई महानगरपालिकेची सार्वत्रिक निवडणूक 15 जानेवारी 2026 रोजी जाहीर करण्यात आली आहे. नवी मुंबई महापालिका निवडणुकीसाठी प्रथमच बहुसदस्यीय प्रभाग पध्दतीनुसार मतदान होणार आहे. एका व्यक्तीस बहुसदस्यीय प्रभाग पध्दतीनुसार 28 प्रभागांपैकी 27 प्रभागांत चार वेळा व एका प्रभागात तीन वेळा मतदान करावयाचे असल्याची माहिती नवी मुंबई महापालिका आयुक्त डॉ. कैलाश शिंदे यांनी १७ डिसेंबर रोजी पत्रकार परिषदेत दिली. महापालिका निवडणूक प्रक्रियेविषय़ी माहिती देण्यासाठी महापालिका मुख्यालयात पत्रकार परिषद घेण्यात आली. त्यामध्ये मतदार संख्या, मतदार यादी, उमेदवारी अर्ज, अर्ज छाननी, मतमोजणी याबाबतची माहिती आयुक्त शिंदे यांनी दिली.
अर्ज दाखल आणि छाननी प्रक्रिया
23 डिसेंबर ते 29 डिसेंबर या कालावधीत सकाळी 11 ते दुपारी 3 तसेच 30 डिसेंबर रोजी सकाळी 11 ते दुपारी 2 या वेळेत नामनिर्देशन पत्र दाखल करता येणार आहेत..25 डिसेंबर व 28 डिसेंबर रोजी नामनिर्देशन पत्रे देण्यात, स्विकारण्यात येणार नाहीत. 31 डिसेंबर रोजी सकाळी 11 वा. पासून नामनिर्देशन पत्रांची छाननी करण्यात येणार असून त्यानंतर लगेचच वैधरित्या नामनिर्देशित उमेदवारांची यादी प्रसिध्द केली जाणार आहे. 2 जानेवारी रोजी सकाळी 11 ते दुपारी 03 या वेळेपर्यंत उमेदवारी अर्ज मागे घेता येणार असून 3 जानेवारी 2026 रोजी सकाळी 11 नंतर निवडणूक चिन्ह नेमून दिले जाणार आहे. 3 जानेवारी रोजीच अंतिमरित्या निवडणूक लढविणा-या उमेदवारांची यादी प्रसिध्द केली जाणार आहे.
1141 मतदान केंद्रे
नमुंमपा निवडणूक 111 सदस्य संख्येकरिता होत असून 28 प्रभाग झालेले आहेत. त्यामध्ये 27 प्रभाग हे 4 सदस्यीय असून एक प्रभाग 3 सदस्यीय आहे. एकुण 9,48,460 इतकी एकूण मतदार संख्या असून त्यामध्ये 5,16,267 पुरुष व 4,32,040 इतके स्त्री मतदार आणि 153 इतर मतदार आहेत. यावेळी चार सदस्यीय प्रभाग असल्याने एका मतदारास चार सदस्यांना मतदान करावयाचे आहे, यादृष्टीने एका मतदान केंद्रावर जास्तीत जास्त 800 ते 850 मतदार असतील याकडे लक्ष देण्यात आलेले आहे. एकूण 28 प्रभागांसाठी 1141 इतकी मतदान केंद्रे कार्यान्वित असणार आहेत. निवडणूक प्रक्रिया सुरळीतपणे रितीने पार पाडण्यासाठी नवी मुंबई महानगरपालिका प्रशासन सज्ज असून या कामकाजासाठी आवश्यक असलेल्या 6275 कर्मचा-यांचे नियोजन करण्यात येत असल्याची माहिती आयुक्तांनी यावेळी दिली.
आठ विभाग क्षेत्रासाठी निवडणूक निर्णय अधिकारी
- निवडणूकीकरिता आठ विभाग क्षेत्रासाठी निवडणूक निर्णय अधिकारी यांची कार्यालये स्थापित करण्यात आली असून प्र.क्र 1,2,3 करिता माता बाल रुग्णालय इमारत दिघा या ठिकाणी व प्र.क्र 4,5,7 करिता सरस्वती विद्यालय से.5 ऐरोली याठिकाणी निवडणूक निर्णय अधिकारी यांचे कार्यालय असणार आहे.
- प्र.क्र.6,8,9 करिता समाजमंदिर हॉल. भूखंड क्र 10, से. 07 घणसोली आणि प्रक्र 10,11,12,13 करिता आण्णासाहेब पाटील सभागृह, पहिला मजला, से. 05 कोपरखैरणे येथे कार्यालय असणार आहे.
- प्र.क्र. 14,15,19,20 याकरिता आण्णाभाऊ साठे समाजमंदिर, प्लॅट नं 187 से.10 सानपाडा आणि प्र.क्र. 16,17,18 करिता जलतरण तलाव संकुल, भूखंड क्र 196 से.12 वाशी या ठिकाणी निवडणूक निर्णय अधिकारी यांचे कार्यालय आहे.
- प्र.क्र. 21,22,23,24 करिता आगरी कोळी भवन, प्लॅाट नं 12, से.24, नेरुळ याठिकाणी तसेच प्र.क्र. 25,26,27,28 करिता ए विभाग कार्यालय बेलापूर भवन, से.11, सीबीडी बेलापूर येथे निवडणूक निर्णय अधिकारी यांचे कार्यालय सुरु करण्यात आले आहे.
- उमेदवारांना अर्ज दाखल करताना आवश्यक असणारी मालमत्ता कर, पाणीपट्टी तसेच इतर ना हरकत प्रमाणपत्रे एक खिडकी योजनेनुसार संबधित विभाग कार्यालय पातळीवरुन एकाच ठिकाणाहून देण्यात येतील असेही त्यांनी सांगितले.
समन्वय अधिका-यांची नेमणूक
निवडणूक प्रक्रिया सुनियोजित रितीने पार पाडण्यासाठी महानगरपालिकेच्या विभाग प्रमुखांना निवडणूक कामांच्या अनुषंगाने समन्वय अधिकारी म्हणून जबाबदारी देण्यात आली असून आवश्यक कामे करण्याकरिता कर्मचारीवर्गही उपलब्ध करुन देण्यात आलेला आहे. त्यामध्ये आचार सहिता अंमलबजावणी कक्षाचे समन्वयक अधिकारी म्हणून अतिरिक्त आयुक्त सुनिल पवार काम पाहणार असून कायदा व सुव्यवस्था आणि सुरक्षा आराखडयाचे काम अतिरिक्त आयुक्त डॉ. राहुल गेठे पाहणार आहेत. मिडीया सेल व एमसीएमसी कमिटीचे समन्वयक अधिकारी म्हणून मुख्य लेखा व वित्त अधिकारी सत्यवान उबाळे काम पाहणार असून निवडणूक खर्च विषयक कामकाजाची जबाबदारी मुख्य लेखा परीक्षक राजेंद्र गाडेकर यांच्याकडे सोपविण्यात आलेली आहे.
————————————————————————————————
