- अविरत वाटचाल न्यूज नेटवर्क
- नवी मुंबई , 8 ऑक्टोबर 2026
नवी मुंबई आंतरराष्ट्रीय विमानतळ पोलीस ठाण्यात दाखल असलेल्या गुन्ह्यात अटक करण्यात आलेल्या ३८ वर्षीय आरोपीचा लॉकअपमध्ये प्रकृती बिघडल्यानंतर उपचारादरम्यान मृत्यू झाला. मूळचा उत्तर प्रदेशातील वाराणसी इथला आणि सध्या उलवे इथे राहणाऱ्या 38 वर्षिय संजय कंटू यादव असे मृत आरोपीचे नाव आहे. या घटनेनंतर पुढील कायदेशीर प्रक्रिया सुरू करण्यात आली आहे. या घटनेनंतर एकच खळबळ उडाली आहे. #
संजय यादव याच्याविरुद्ध नवी मुंबई आंतरराष्ट्रीय विमानतळ पोलीस ठाण्यात गुन्हा रजिस्टर क्रमांक १८/२०२६ अन्वये भारतीय न्याय संहितेच्या कलम ३०३(२), ३(५) अंतर्गत गुन्हा दाखल करण्यात आला होता. या प्रकरणात त्याला ४ ऑक्टोबर २०२६ रोजी पहाटे ३.३३ वाजता अटक करण्यात आली. अटकेपूर्वी त्याची पनवेल ग्रामीण रुग्णालयात वैद्यकीय तपासणी करण्यात आली होती.
या प्रकरणात न्यायालयाने ४ ऑक्टोबर रोजी यादव याला ६ ऑक्टोबरपर्यंत, तर ६ ऑक्टोबर रोजी ८ ऑक्टोबरपर्यंत पोलीस कोठडी सुनावली होती. रिमांडसाठी न्यायालयासमोर हजर केले असताना आरोपीने कोणत्याही प्रकारची तक्रार केली नव्हती. तसेच वैद्यकीय तपासणीदरम्यानही त्याने आरोग्याशी संबंधित कोणतीही तक्रार अथवा पूर्वीच्या आजाराचा इतिहास सांगितला नव्हता.
दरम्यान, आरोपीला एनआरआय सागरी पोलीस ठाण्याच्या लॉकअपमध्ये ठेवण्यात आले होते. ८ ऑक्टोबरच्या मध्यरात्रीच्या सुमारास लॉकअप गार्डच्या निदर्शनास आरोपी हाताच्या मुठी वळवून हात-पाय वाकडे करत असल्याचे आले. त्याची प्रकृती बिघडल्याचे लक्षात येताच लॉकअप गार्डने ठाणे अंमलदारांच्या मदतीने त्याला तातडीने नेरूळ येथील मीनाताई ठाकरे रुग्णालयात उपचारासाठी दाखल केले.
रुग्णालयात आरोपीला ८ ऑक्टोबर रोजी रात्री १२.५० वाजता दाखल करण्यात आले. वैद्यकीय उपचार सुरू असतानाच रात्री १.३६ वाजता वैद्यकीय अधिकारी डॉ. रामदास आंबुर्डे यांनी त्याला मयत घोषित केले.
आरोपीच्या मृत्यूची माहिती मिळाल्यानंतर संबंधित यंत्रणांकडून पुढील कायदेशीर प्रक्रिया सुरू करण्यात आली आहे. मृत्यूचे नेमके कारण, वैद्यकीय अहवाल आणि अन्य आवश्यक बाबींच्या आधारे पुढील कार्यवाही केली जाणार आहे.
========================================================
