- अविरत वाटचाल न्यूज नेटवर्क
- नवी मुंबई, 12 डिसेंबर 2023
नवी मुंबई महानगरपालिका आरोग्य विभागाच्या वतीने 10 डिसेंबर रोजी उपराष्ट्रीय पल्स पोलिओ लसीकरण मोहीम महानगरपालिका क्षेत्रात प्रभावी रितीने राबविण्यात आली. नवी मुंबई महानगरपालिकेच्या २४ नागरी आरोग्य केंद्रांमार्फत खाजगी वैद्यकीय व्यावसायिकांचे दवाखाने, सोसायटी कार्यालये, रूग्णालये, रेल्वे स्टेशन, बस डेपो, बाजारपेठ, टोल नाके इत्यादी विविध ठिकाणी ६०५ स्थायी, ९३ ट्रांझिट व २७ मोबाईल असे एकूण ७२५ पोलिओ लसीकरण बूथ स्थापन करण्यात आले.
‘दोन थेंब प्रत्येक वेळी, पोलिओवर विजय दरवेळी’ – या घोषवाक्यास अनुसरून घरोघरी जाऊन नागरी आरोग्य केंद्रांच्या माध्यमातून पोलिओ लसीकरण मोहीमेची माहिती पोहचविण्यात आली
लसीकरण बूथवरील २ हजारहून अधिक कर्मचारी, स्वयंसेवकामार्फत लस पाजण्यात आली. नवी मुंबई कार्यक्षेत्रात एकूण 81% इतक्या बालकांना लस पाजण्याचे काम पूर्ण झाले. तथापि काही कारणांमुळे ज्या अपेक्षित लाभार्थी बालकांचे लसीकरण होऊ शकले नाही त्यांना 11 डिसेंबर ते 15 डिसेंबर २०२३ या कालावधीत घरोघरी जाऊन पल्स पोलिओ डोस देण्याचे नियोजन करण्यात आले आहे.
आपला भारत देश कायमस्वरूपी पोलिओ मुक्त रहावाया दृष्टीने उप राष्ट्रीय पल्स पोलिओ लसीकरण मोहीमेस नवी मुंबईकर नागरिकांनी उत्तम प्रतिसाद दिला. मात्र ज्या बालकांना रविवारी बूथवर जाऊन डोस घेतला नाही, अशा बालकांनसाठी विशेष मोहिम राबविली जात असून घरांना भेट देणा-या नमुंमपा मार्फत स्वयसेवकांना पोलिओ डोस पाजून घेण्याकरिता पाल्यबालकांचे योग्य माहिती देऊन संपूर्ण सहकार्य करण्याचे आवाहन महापालिका आयुक्त राजेश नार्वेकर यांच्या वतीने करण्यात येत आहे.
========================================================
========================================================
