- सिद्धार्थ हरळकर/अविरत वाटचाल
- नवी मुंबई, 6 फेब्रुवारी 2026
नवी मुंबई महापालिका निवडणुकीचा निकाल स्पष्ट झाला असून भाजपने शिवसेनेची कडवी झुंज मोडून काढत निर्विवाद वर्चस्व मिळवले आहे. नवी मुंबई महानगरपालिका निवडणुकीत अनेक ज्येष्ठ तसेच दिग्गज नगरसेवकांना पराभवाचा धक्का बसला आहे. त्यामुळे थेट निवडणुकीद्वारे सभागृहात पोहोचण्याचा मार्ग बंद झाल्यामुळे आता स्वीकृत नगरसेवक म्हणून आपली वर्णी लागावी यासाठी प्रयत्न सुरु केले आहेत.
निवडणुकीत भाजपला ६५ जागा मिळाल्या आहेत. तर शिवसेना शिंदे गटाला ४२ जागा मिळाल्या आहेत. याशिवाय शिवसेना उबाठा २, मनसे १ आणि अपक्षाला १ जागा मिळाली आहे. अपक्ष उमेदवाराने भाजपला साथ दिली आहे. साधारण १० सदस्यांमागे १ स्वीकृत नगरसेवक याप्रमाणे भाजपचे ६ तर शिवसेना शिंदे गटाचे ४ स्वीकृत नगरसेवक सभागृहात बसणार आहेत.
क्लिक करा : नवी मुंबईच्या महापौरपदी सुजाता पाटील व उपमहापौरपदी दशरथ भगत विराजमान
मात्र हे स्वीकृत नगरसेवकपद आपल्याला मिळावे यासाठी दोन्ही पक्षांमधील ज्येष्ठांमध्ये जोरदार रस्सीखेच सुरु आहे.
भाजपपुरते बोलायचे झाल्यास यंदाच्या निवडणुकीत पक्षाचे नवीन गवते, अपर्णा गवते, शशिकला सुतार, अनंत सुतार, उषा भोईर आदींना निवडणुकीत धक्का बसला आहे. त्यामुळे स्वीकृत सदस्यपदासाठी आपला विचार व्हावा अशी अनेकांची अपेक्षा असणार आहेत. परंतु पक्ष नेतृत्व या माजी नगरसेवकांचा विचार करणार की ज्यांना उमेदवारी देता आली नाही अशा नाराज आणि निष्ठावंतांना न्याय देणार हे लवकरच समजेल.
क्लिक करा : बुद्धिमत्तेवर विश्वास हवा
निवडणुकीत शिवसेना शिंदे गटाने जोरदार झुंज दिली. मात्र या लढाईत शिवसेना शिंदे गटाचे अनेक दिग्गज उमेदवार पराभूत झाले आहेत. एम.के.मढवी, सोमनाथ वास्कर, कोमल वास्कर, दिलीप घोडेकर, काशीनाथ पवार, राष्ट्रवादीतून शिवसेनेत दाखल झालेले नामदेव भगत यांच्यासह अनेकांना पराभवाचा धक्का बसला आहे. त्यामुळे पक्षाच्या वाट्यातील स्वीकृत सदस्यपदासाठी कोणाला पसंती मिळणार याकडे सगळ्यांचे लक्ष लागले आहे.
नवी मुंबई महापालिकेत भाजप विरुद्ध शिवसेना अशीच टक्कर होणार असे चित्र दिसत आहे. कारण निवडणुकीच्या काळात शिवसेनेचे पक्षप्रमुख तसेच उपमुख्यमंत्री एकनाथ शिंदे आणि भाजपचे नेते वनमंत्री गणेश नाईक यांच्यात चांगलेच शाब्दीक युद्ध रंगले होते. दोन्ही नेत्यांनी एकमेकांवर जोरदार टीका केली होती. त्यामुळे नवी मुंबईवर वर्चस्व ठेवण्यासाठी दोन्ही नेत्यांमध्ये शीतयुद्ध चालूच राहणार असून आपल्या निवडून गेलेल्या नगरसेवकांच्या मदतीने एकमेकांवर कुरघोडी करण्याची संधी दोन्ही नेते सोडणार नाहीत. त्यामुळे सभागृहात भाजपशी दोन हात करण्यासाठी काही अनुभवी लोकांना स्वीकृत सदस्य म्हणून संधी देण्याचे धोरण उपमुख्यमंत्री एकनाथ शिंदे आखतील, अशी चर्चा सुरु आहे.
नवी मुंबई महापालिकेत महापौर आणि उपमहापौरपदी भाजपचाच उमेदवार असणार हे निश्चित झाले आहे. भाजपच्या गटनेतेपदाचीही निवड झालेली असून माजी महापौर सागर नाईक भाजपची धुरा सांभाळणार आहेत. एकीकडे भाजपची रणनिती पूर्ण झालेली असली तर शिवसेनेतर्फे विरोधी पक्षनेतेपदाचे कोडे अद्याप सुटलेले नाही. शिवसेना शिंदे गटातर्फे विरोधी पक्षनेतेपद कुणाला मिळणार याबाबत अद्याप स्पष्ट झाले नसले तरी उपनेते विजय चौगुले आणि नवी मुंबई जिल्हाप्रमुख किशोर पाटकर यांच्या नावांची चर्चा आहे. एकीकडे ही चर्चा सुरु असली तरी अधिक चर्चा ही स्वीकृत सदस्याची लॉटरी कुणाला लागणार याचीच रंगली आहे. त्यामुळे सभागृहात १० स्वीकृत नगरसेवक कोण असणार याबाबत उत्सुकता अधिक लागून राहीली आहे.
========================================================
