- अविरत वाटचाल न्यूज नेटवर्क
- नवी मुंबई,22 डिसेंबर 2025
करावे, नवी मुंबईः ज्ञानदीप सेवा मंडळ प्राथमिक शाळा, करावे आणि भावना फाउंडेशन यांच्या संयुक्त विद्यमाने आंतरशालेय क्रीडा महोत्सव : लंगडी स्पर्धा २०२५ चे आयोजन १० डिसेंबर २०२५ रोजी ज्ञानदीप शाळा मैदानावर उत्साहात पार पडले.
नवी मुंबई परिसरातील २२ शाळांच्या ५०० विद्यार्थ्यांनी स्पर्धेत सहभाग नोंदवून खेळाडूवृत्ती, शिस्त आणि संघभावनेचे उत्कृष्ट प्रदर्शन केले. स्पर्धेचे उद्घाटन सरस्वती पूजन व दीपप्रज्ज्वलनाने करण्यात आले.
या स्पर्धेसाठी प्रमुख पाहुणे म्हणून नवी मुंबई महापालिकेच्या घनकचरा व्यवस्थापन विभागाचे उपायुक्त डॉ. अजय गडगे, क्रीडा उपायुक्त अभिलाषा म्हात्रे, बेलापूर केंद्र प्रमुख रेखा पाटील, वाहतूक विभागाच्या वरिष्ठ पोलीस निरीक्षक मोहिनी लोखंडे, सुवर्णा मिसाळ व अन्य मान्यवर उपस्थित होते.
उपस्थित पाहुण्यांनी विद्यार्थ्यांना शिक्षणाबरोबरच क्रीडा, चारित्र्य व संस्कारांचे महत्त्व अधोरेखित केले. नवी मुंबईत प्रथमच १ ली ते ४ थी गटासाठी मुले आणि मुलींसाठी स्पर्धेचे आयोजन केले गेले .
या स्पर्धेचे मार्गदर्शन संस्थेचे अध्यक्ष रवींद्र नाईक आणि मुख्याध्यापक बंकट तांडेल यांच्या नेतृत्वाखाली समन्वय साधत कार्यक्रम उत्तमरीत्या पार पाडला.
या कार्यक्रमसाठी संस्थेचे कार्यकारिणी सदस्य प्रसाद तांडेल, मधुकर पाटील, हरिश्चन्द्र तांडेल, पंडित तांडेल अरविंद नाईक, सुरेखा तांडेल उपस्थित होते या स्पर्धेत विद्यार्थ्यांनी चपळाई, समन्वय आणि उत्कृष्ट खेळ कौशल्याचे प्रदर्शन केले.
या स्पर्धेतील विजेत्यांना मान्यवरांच्या हस्ते पुरस्कार प्रदान करण्यात आले.
स्पर्धेतील विजेत्या संघांना ट्रॉफी, प्रमाणपत्रे आणि खालीलप्रमाणे रोख रकमेची पारितोषिके देण्यात आली. प्रथम पुरस्काराची रक्कम २५५५ रुपये, दुसरा क्रमांक १५५५ रुपये तर तिसरा क्रमांक १००१ रुपये. विजेता संघ : ज्ञानविकास कोपरखैरणे उपविजेता : ज्ञानदीप प्राथमिक करावे आणि डी आर पाटील विद्यालय तुर्भे.
========================================================
