निवडणूकीसाठी यंत्रणा सज्ज

नवी मुंबई महानगरपालिकेच्या सार्वजनिक निवडणुकीसाठी उद्या मतदान होणार आहे. 111 प्रभागांमध्ये 466 उमेदवार निवडणूक लढवत आहेत.

महापालिका क्षेत्रातील 28 प्रभागांमध्ये ही निवडणूक बहुसदस्यीय पॅनल पध्दतीने होत असून 1 ते 27 प्रभागांमध्ये अ,ब,क,ड अशा 4 जागांकरिता व 28 व्या प्रभागामध्ये अ,ब,क अशा तीन जागांकरिता  नागरिक मतदान करणार आहेत.

नवी मुंबई महानगरपालिका क्षेत्रामध्ये 9 लाख 48 हजार 460 इतकी मतदार संख्या असून त्यामध्ये 5 लाख 16 हजार 267 पुरुष व 4 लाख 32 हजार 040 महिला आणि 153 इतर मतदार आहेत.  निवडणूकीसाठी 8 विभागांमध्ये निवडणूक निर्णय अधिकारी असणार आहेत. शहरात 191  ठिकाणांवर 1 हजार 148 मतदान केंद्रे स्थापन करण्यात आली आहेत.

 क्लिक करा :  राज्यातील १२ जिल्हा परिषदा आणि १२५ पंचायत समित्यांची निवडणूक जाहीर

मतदान केंद्रावरील कामकाजाकरिता मतदान केंद्राध्यक्ष, 3 मतदान केंद्र अधिकारी व शिपाई अशा एकूण 6 हजार 890  कर्मचाऱ्यांची नेमणूक करण्यात आली आहे.

कायदा व सुव्यवस्थेच्या दृष्टीने नवी मुंबई पोलीस विशेष शाखा यांच्या माध्यमातून पोलीस बंदोबस्त उपलब्ध करून देण्यात आलेला आहे. यामध्ये – 2 पोलीस उपआयुक्त, 8 सहा. पोलीस आयुक्त, 28 पोलीस निरीक्षक तसेच 241 पीएसआय. 2123 पोलीस पुरूष – महिला कर्मचारी, 1186 होमगार्ड त्याचप्रमाणे एसआरपीएफच्या 7 प्लॅटून यांचे लक्ष राहणार आहे.

========================================================