बिर्ला कॉलेजच्या विद्यार्थ्यांचे स्तुत्य पाऊल!
- अविरत वाटचाल न्यूज नेटवर्क
- मुंबई, 23 जुलै 2025
वर्ल्ड ब्रेन डेच्या निमित्ताने, जेव्हा संपूर्ण जग आरोग्यदायी जीवनशैलीचा विचार करत असते, तेव्हा कल्याणच्या बिर्ला कॉलेजमधील काही तरुण विद्यार्थी व विद्यार्थीनींनी एका वेगळ्याच पद्धतीने समाजप्रबोधन केलं.”हेल्मेट म्हणजे बंधन नव्हे, ते जीवनाची हमी आहे” – असा ठाम संदेश देणारी ही मोहीम खरंच कौतुकास पात्र आहे. त्यांनी केवळ पोषणच नव्हे, तर “जीवन वाचवण्यासाठी सुरक्षेचं महत्त्व” या मुद्द्यावर लक्ष वेधलं.
कल्याण ते छत्रपती शिवाजी महाराज टर्मिनस या लोकल प्रवासादरम्यान या विद्यार्थ्यांनी अनोखी जनजागृती मोहीम राबवली. बाईक चालवताना होणाऱ्या अपघातांमध्ये वाढ होत आहे, याची तीव्रता ओळखून त्यांनी लोकल ट्रेनमध्ये हेल्मेट परिधान करून प्रवास केला व प्रवाशांना “हेल्मेट वापरा, जीव वाचवा” असा थेट संदेश दिला.
ही जनजागृती ही केवळ लोकलपुरतीच मर्यादित राहिली नाही. विद्यार्थ्यांनी पुढे छत्रपती शिवाजी महाराज टर्मिनस स्टेशनबाहेरील रस्त्यावर जाऊन, दिवसभर नागरिकांना थांबवून, संवाद साधून आणि हातात फलक घेऊन अपघातांचे प्रमाण कमी करण्यासाठी प्रबोधन केलं.
या उपक्रमामध्ये निसर्ग कांबळे,अनुजा खंडारे,विनिष्का पाटील,नंदिनी म्हात्रे,गायत्री घेगडमल,पायल डोंबे,ज्युबिया शेख या विद्यार्थ्यांचा उत्स्फूर्त सहभाग होता. हे विद्यार्थी केवळ शैक्षणिक क्षेत्रातच नव्हे तर सामाजिक भान ठेवून कार्यरत असल्याचं यावरून स्पष्ट होतं. त्यांचा हा उपक्रम इतर तरुणांसाठी प्रेरणादायी आहे.
========================================================
