- अविरत वाटचाल न्यूज नेटवर्क
- नवी मुंबई, 5 फेब्रुवारी 2026
नवी मुंबई महानगरपालिकेच्या महापौर – उपमहापौरपदासाठी आज झालेल्या निवडणूकीत सुजाता सुरज पाटील यांची महापौरपदी तसेच दशरथ सिताराम भगत यांची उपमहापौरपदी निवड झाल्याचे ठाणे जिल्हा परिषदेचे मुख्य कार्यकारी अधिकारी रणजित यादव यांनी पिठासन अधिकारी म्हणून जाहीर केले .
क्लिक करा : ठाणे महापौरपदी शर्मिला पिंपळोलकर तर कृष्णा पाटील यांची उपमहापौरपदी निवड
महापौरपदासाठी दाखल झालेल्या अर्जातून नगरसेविका सरोज रोहिदास पाटील यांनी तसेच उपमहापौरपदासाठी दाखल झालेल्या अर्जातून नगरसेवक आकाश बाळकृष्ण मढवी यांनी आपले उमेदवारी अर्ज मागे घेतल्याने महापौर पदावर सुजाता पाटील व उपमहापौर पदावर दशरथ भगत बिनविरोध निवडून आले.
सभागृहाच्या वतीने दिवंगत उपमुख्यमंत्री स्व.अजितदादा पवार यांना स्तब्ध उभे राहून भावपूर्ण श्रध्दांजली अर्पण करण्यात आली. त्यानंतर मनोगत व्यक्त करतांना नवनिर्वाचित महापौर व उपमहापौर यांनी सर्व सदस्यांचे आभार मानले.
महापालिका आयुक्त डॉ. कैलास शिंदे यांनी महापौर व उपमहापौर यांचे पुष्पगुच्छ देऊन अभिनंदन केले.
महापौर सुजाता पाटील यांनी स्वच्छता, आरोग्य, शिक्षण, पर्यावरण व वाहतूक नियोजन हे आपले प्राधान्यक्रम राहतील असे सांगितले. तरुणांना संधी, महिलांची सुरक्षा व सन्मान, ज्येष्ठ नागरिकांचा आदर व सर्वसामान्य माणसांना अपेक्षित असणा-या सुविधा पुरविण्याचा आग्रही व प्रामाणिक प्रयत्न राहील असे त्या म्हणाल्या. वरिष्ठांनी सोपविलेली नवी मुंबईच्या महापौरपदाची संधी ही मोठी जबाबदारी मानून काम करणार असल्याचे सांगत सभागृहातील वरिष्ठ सदस्यांचे मार्गदर्शन व सर्व सदस्यांचे सहकार्य यातून शिस्तप्रिय काम होईल असा विश्वास त्यांनी व्यक्त केला. आपली महापौरपदी निवड ही महिलांच्या समाजातील प्रगतीशील वाटचालीची साक्ष असल्याचे सांगत गृहिणी ते नगरसेविका व महिला व बालकल्याण समितीची सभापती नंतर आता महापौरपदाची लाभलेली संधी याबद्दल आनंद व्यक्त करतांनाच नवी मुंबईच्या गतीमान व सर्वांगीण विकासासाठी कटिबध्द राहण्याचे व संवेदनशीलपणे काम करणार असल्याचे त्यांनी सांगितले.
उपमहापौर दशरथ भगत यांनी देशभरात नावलौकिक असणा-या नवी मुंबईच्या अधिक गतीमान विकासासाठी उपमहापौरपद ही एक मोठी संधी असून त्यासाठी अथक व प्रामाणिकपणे काम करणार असल्याचे सांगितले. आगामी काळात नवी मुंबईकर नागरिकांना अपेक्षित असे चांगले काम सर्वांना सोबत घेऊन केले जाईल असा निर्धार व्यक्त केला.
याप्रसंगी अतिरिक्त आयुक्त सुनिल पवार व राहुल गेठे आणि इतर विभागप्रमुख तसेच माजी खा. संजीव नाईक, माजी आ संदीप नाईक आणि इतर मान्यवरांनी उपस्थित राहून नवनिर्वाचित महापौर, उपमहापौर यांचे अभिनंदन केले.
========================================================
