कोट्यवधींचा ऐवज जप्त, 10 जणांची टोळी गजाआड
- अविरत वाटचाल न्यूज नेटवर्क
- मुंबई, 7 नोव्हेंबर 2025
सुरक्षेची कोणतीही उपाययोजना न करता अरबी समुद्रात बेकायदेशीररित्या डिझेलची चोरटी वाहतूक करण्याचा प्रयत्न यलोगेट पोलिसांनी उधळून लावला आहे. याप्रकरणी धडक कारवाई करून डिझेल वाहतूक करणारे दोन बार्ज तसेच लाखो रुपये किंमतीचे डिझेलसदृश्य द्रवपदार्थ असा तब्बल साडेचार कोटी रुपयांचा ऐवज जप्त करण्यात आला आहे. याप्रकरणात ज्वलनशील पदार्थांची बेकायदेशीररित्या वाहतूक करणाऱ्या 10 जणांना अटक करण्यात आली आहे.
यलोगेट पोलिसांनी मिळालेल्या माहितीनुसार, अरबी समुद्रातील भाऊचा धक्का परिसरातील न्यू फिश जेट्टी समोरील एंकरेज परिसरात 6 नोव्हेंबर रोजी विनापरवाना अवैधरित्या चोरीचे डिझेल खरेदी करून तसेच डिझेलसारख्या ज्वालाग्रही पदार्थांची सुरक्षेची कोणतीही खबरदारी न घेता बेकायदेशीररित्या वाहतूक केली जात असल्याची माहिती यलोगेट, मुंबई पोलिसांना मिळाली होती. याबाबतची माहिती मिळताच दक्षिण प्रादेशिक विभागाचे अप्पर पोलीस आयुक्त, बंदर परिमंडळचे पोलीस उपायुक्त तसेच यलोगेट विभागाचे सहाय्यक पोलीस आय़ुक्त आदींना तातडीने कळविण्यात आले.
क्लिक करा : दहावी बारावी लेखी व प्रात्यक्षिक परीक्षेचे वेळापत्रक जाहीर
वरिष्ठ पोलीस अधिकाऱ्यांच्या मार्गदर्शनानुसार यलोगेट पोलीस ठाण्याचे वरिष्ठ पोलीस निरीक्षक चेतन राठोड तसेच पोलीस निरीक्षक सुदर्शन चव्हाण, पोलीस उपनिरीक्षक दत्तात्रय तोडकर, पोलीस कर्मचारी सिकंदर डोलकर, सागर पाटील, निलेश जगताप आदींच्या पथकाने भर समुद्रात तातडीने कारवाई करीत दोन बार्ज ताब्यात घेतले. यातील श्री अनंत लक्ष्मी पीएनजे 430 हा बार्ज आणि 8 लाख 73 हजार रुपये किंमतीचे तब्बल 9 हजार 700 लिटर डिझेल सदृश्य द्रवपदार्थ असे एकूण 2 कोटी 58 लाख 73 हजार रुपयांचा ऐवज तसेच एम.टी. प्रणय बीडीआर – 4 – 00094 या 2 कोटी रुपये किंमतीच्या बार्जसह आणखी 300 लिटर डिझेलसदृश्य द्रवपदार्थ जप्त केला.
क्लिक करा : इतिहास आणि जलसंवर्धन
मुंबईलगत अरबी समुद्रात अशाप्रकारे अवैधरित्या ज्वलनशील पदार्थांची वाहतूक केल्याप्रकरणी यास्मीन उरमान मुजावर, रामराज धनीराम सिंग, कमलेश गोरख दीक्षित, दिपक कुमार होमपाल सिंग, लोकेशकुमार राजुलाल सैनी, राजन कुमार सुरजन यादव, प्रदीप कुमार वैद्य, गोपाल इभानसिंग कुवर, नेत्रा नरमसिंग कुवर, दिपंद्र कडकसिंग कुवर या आरोपींना अटक करण्यात आली आहे, याप्रकरणातील श्रीकृष्ण ग्रुप कंपनीचा सुपरवायझर प्रदीप पंडीत, कंपनाचा मालक विशाल,एम.टी, प्रणय बार्जचा मालक गंगाराम कोंडीबा इंगळे यांचा तपास सुरु असल्याची माहिती यलोगेट पोलीस ठाण्याचे वरिष्ठ पोलीस निरीक्षक चेतन राठोड यांनी दिली.
========================================================
