ना सिडकोचे लक्ष, ना नवी मुंबई महानगरपालिकेचे लक्ष
प्रशासनाच्या उदासिनतेमुळे नागरिकांमध्ये नाराजीची भावना
- अविरत वाटचाल न्यूज नेटवर्क
- नवी मुंबई, 20 ऑगस्ट 2025
नवी मुंबई, नेरुळ, सेक्टर-१ मधील विघ्नहर्ता सोसायटी मधील एका घराच्या छताचे प्लास्टर घरातील सदस्यांच्या अंगावर पडले आहे. या दुर्घटनेत महिला गंभीर जखमी झाली आहे. या महिलेला डोक्यावर स्लॅबच्या प्लास्टरचा मोठा तुकडा पडून गंभीर दुखापत झाली आहे.हा अपघात पहाटे सकाळी पाच वाजण्याच्या सुमारास झाला. महिला व कुटुंब झोपलेले असताना हा अपघात घडला.
घटनेची माहिती मिळाल्यावर स्थानिक नागरीक तसेच मनसेच्या कार्यकर्त्यांनी गंभीर जखमी झालेल्या महिलेला रुग्णालयात नेले आणि या महिलेवर इलाज केले. हा अपघात पहाटे सकाळी पाच वाजण्याच्या सुमारास झाला. महिला व कुटुंब झोपलेले असताना हा अपघात घडला.
मनसे शहर सचिव सचिन कदम यांनी दुर्घटनाग्रस्त घराला भेट देवून महिलेची विचारपूस केली. प्लास्टर कोसळून जखमी झालेली महिला गर्भवती असल्याचे समजते.सिडको व महानगरपालिका यांच्या गलथान कारभारा मुळे नागरिकांना जीव मुठीत घेऊन राहावे लागत आहे. असे मत सचिन कदम यांनी व्यक्त केले.
सिडको ने १९८५ ला बांधलेल्या या इमारती आहेत. सिडको ने निकृष्ट दर्जाचे काम केल्याने या इमारतींची दुर्दशा झाली आहे. या इमारती काही वर्षां पूर्वी धोकादायक म्हणून घोषित केल्या आहेत. सिडको ने मुळात पुढाकार घेऊन या इमारतींचा पुनर्विकास करणे आवश्यक आहे. तसेच धोकादायक इमारतींची दुरुस्ती करणे आवश्यक आहे. परंतु सिडको आपली जबाबदारी झटकताना दिसत आहे.
नवी मुंबई महानगरपालिकेने सुद्धा अशा जीर्ण इमारती संदर्भात ठोस भूमिका घेणे जरुरी आहे. परंतु महानगरपालिका याकडे दुर्लक्ष करताना दिसत आहे. एखाद्या नागरिकाने तक्रार केल्यास पालिकेचे अधिकारी त्याकडे दुर्लक्ष करीत असल्याच्या तक्रारी नागरिक करू लागले आहेत. त्यामुळे नवी मुंबई महानगरपालिका आयुक्त कैलास शिंदे यांनी या अधिकाऱ्यांना समज देवून नागरिकांच्या तक्रारींची तातडीने सोडवणूक करण्याच्या सूचना कराव्यात. तसेच येत्या काही दिवसात मनसे सिडको व महानगरपालिका अधिकाऱ्यांना भेटून यावर ठोस उपाययोजना करण्याची मागणी करणार असल्याच सचिन कदम यांनी सांगितले. यावेळी सोबत मनसे विभागअध्यक्ष निखिल गावडे, मनविसे विभागसचिव शंकर घोंगडे-पाटील हे उपस्थित होते.
========================================================
इमारत पुनर्बांधणीबाबत नवी मुंबई महानगरपालिकेचे
माजी आयुक्त डॉ.एन. रामास्वामी यांची मुलाखत
