प्रतिकात्मक फोटो
नवी मुंबई पोलीस गुन्हे शाखेची कामगिरी
- अविरत वाटचाल न्यूज नेटवर्क
- नवी मुंबई, ६ फेब्रुवारी २०२६
स्वस्तात सोने खरेदी करण्याच्या बहाण्याने एका व्यक्तिला खारघरमध्ये बोलावून त्याच्या जवळची 13 लाखांची रोकड लुटणाऱ्या तिघांना नवी मुंबई पोलिसांच्या गुन्हे शाखेने अटक केली आहे. त्यांच्याकडून गुन्ह्यात वापरलेली कार, दुचाकी आणि रोख रक्कमेसह एकूण १५ लाख १४ हजार रुपयांचा मुद्देमाल जप्त करण्यात आल्याची माहिती गुन्हे शाखेच्या सहाय्यक पोलीस आयुक्त प्रेरणा कट्टे यांनी पत्रकार परिषदेत दिली.
स्वस्त सोन्याचे आमिष दाखवून फिर्यादीला खारघरमध्ये बोलावून घेतले होते. खारघर सेक्टर २० येथे १२ जानेवारीला ही घटना घडली होती. सामाजिक माध्यमांचा वापर करत गुन्हेगारांनी स्वस्तात सोने खरेदीचे प्रलोभन दाखवले. त्यानुसार सोने खरेदीसाठी बोलणी सुरू असतानाच दांडके घेऊन आलेल्या तोतया पोलिसांनी कारवाईचा धाक दाखवला.
शिंदे यांची १३ लाख २५ हजार रुपये असलेली बॅग हिसकावून पळ काढला होता. या प्रकरणात खारघर पोलीस ठाण्यात अज्ञात टोळी विरोधात गुन्हा दाखल झाल्यानंतर गुन्हे शाखेने या गुन्ह्याचा तपास सुरु केला होता. घटनास्थळाच्या सीसीटीव्ही फुटेजची तपासणी केली असता, या गुन्ह्यात वापरलेल्या एर्टिगा कारवर बनावट नंबर प्लेट असल्याचे आढळले. तसेच मोटारसायकलवरुन देखील काही आरोपी सोबत असल्याचे आढळून आले. त्यानंतर गुन्हे शाखा मध्यवर्ती कक्षाने तांत्रिक विश्लेषण द्वारे आरोपींचा मागोवा घेऊन नवी मुंबई तसेच कल्याण परिसरातून विशाल बाजीराव तुपे (३५), रोहित राजाराम शेलार (२६) आणि मनोज अंकुश भंडारी (३७) या तिघांना अटक केली. या टोळीत एकूण ८ ते १० जणांचा सहभाग असून, इतर फरार आरोपींच्या अटकेसाठी पोलीस पथके रवाना करण्यात आल्याची माहिती गुन्हे शाखेच्या सहाय्यक पोलीस आयुक्त प्रेरणा कट्टे यांनी दिली.
क्लिक करा: स्वीकृत’साठी ज्येष्ठांमध्ये रस्सीखेच, नव्यांना संधी ?
गुन्हा दाखल झाल्यानंतर मध्यवर्ती कक्षाचे वरिष्ठ पोलीस निरीक्षक सुनिल शिंदे, सहाय्यक पोलीस निरीक्षक सतिश भोसले, सचिन कोकरे, श्रीनिवास तुंगेणवार, महेश जाधव, पोलीस उपनिरीक्षक राहुल भदाने आणि त्यांच्या पथकातील पोलीस अंमलदारांनी ही कारवाई केली.
========================================================
