प्रवाशांच्या सोयीसाठी चार्टिंगच्या वेळेत बदल
- अविरत वाटचाल न्यूज नेटवर्क
- मुंबई, 7 जुलै 2025
लांब पल्ल्याच्या रेल्वेतून प्रवास करणाऱ्या प्रवाशांना आपल्या आरक्षणाची स्थिती लवकर कळावी या उद्देशाने रेल्वे प्रशासनाने मेल आणि एक्सप्रेस ट्रेनच्या तयारीच्या आणि आरक्षण चार्टच्या वेळेत सुधारणा करण्याचा निर्णय घेतला आहे. त्यानुसार रेल्वे बोर्डाच्या निर्देशांनुसार 10 जुलै 2025 पासून ट्रेनचा पहिला आरक्षण चार्ट आता ट्रेन सुटण्याच्या ८ तास आधी तयार केला जाईल .
सध्या आरक्षित प्रवाशांचे नाव, कोच आणि बर्थची माहिती असलेले आरक्षण चार्ट मूळ स्थानक किंवा दूरच्या स्थानकातून ट्रेन सुटण्याच्या ४ तास आधी प्रसिद्ध केले जातात. आता वेळ वाढविल्यामुळे प्रवाशांना प्रवासाच्या आधी 8 तास आपल्या आरक्षणाची स्थिती कळणार आहे.
सुधारित चार्टिंग वेळा पुढीलप्रमाणे:
• ज्या ट्रेन पहाटे 5 ते दुपारी 2 दरम्यान सुटतील. त्या ट्रेनसाठी पहिली आरक्षण यादी आधीच्या दिवशी रात्री 9 वाजता तयार केली जाईल.
• ज्या ट्रेन दुपारी 2 ते दुसऱ्या दिवशी पहाटे 5 या काळात सुटतील त्यांची पहिली आरक्षण यादी त्या ट्रेनच्या प्रस्थानाच्या ८ तास आधी तयार केली जाईल.
• दुसऱ्या आरक्षण चार्टसाठी सध्याच्या प्रक्रियेत कोणताही बदल होणार नाही, जो सध्याच्या तरतुदींनुसार सुरू राहील.
• अंतिम आरक्षण चार्ट ट्रेनच्या नियोजित सुटण्याच्या ३० मिनिटे आधी तयार केला जाईल.
प्रवासी अंतिम यादी तयार होईपर्यंत रिक्त बर्थसाठी आरक्षण करू शकतील. हा निर्णय प्रवाशांना त्यांच्या प्रवासाचे नियोजन चांगल्या पद्धतीने करता यावे आणि शेवटच्या क्षणी गोंधळ व गर्दी टाळता यावी या उद्देशाने घेतला आहे, असे रेल्वे प्रशासनाने कळविले आहे.
========================================================
