- अविरत वाटचाल न्यूज नेटवर्क
- नवी मुंबई, 12 ऑक्टोबर 2025
मेजर संदीप उन्नीकृष्णन – अशोकचक्र यांच्या सन्मानार्थ राष्ट्रीय सुरक्षा दल यांच्या वतीने गर्भाशय कर्करोग जनजागृतीसाठी ‘सायक्लोथॉन’चे (NSG Cyclothon )आयोजन करण्यात आले होते. सकाळी 7 वा. मुंबईतून गेट वे ऑफ इंडियापासून सुरू झालेल्या या सायक्लोथॉनव्दारे (NSG Cyclothon ) राष्ट्रभक्तीचा व आरोग्याविषयी जागरूकतेचा संदेश प्रसारित करण्यात आला.
नवी मुंबई महानगरपालिका आयुक्त डॉ.कैलास शिंदे यांनी यामध्ये स्वत: सहभागी होत राष्ट्रभक्तीचा व आरोग्य जनजागृतीचा संदेश प्रसारित केला.मुंबईपासून नवी मुंबईमार्गे पवईपर्यंत जाणा-या या सायक्लोथॉनचा (NSG Cyclothon ) सेक्टर 26, नेरूळ येथील ज्वेल ऑफ नवी मुंबई या पर्यटकांचे आवडते ठिकाण असणा-या स्थळावर विशेष थांबा घेण्यात आला. यावेळी किंग हॉस्पिटल मुंबईच्या डॉक्टरांनी गर्भाशयाच्या कर्करोगाविषयी पथनाट्य सादर करीत त्याविषयी सविस्तर माहिती दिली. महापालिका आयुक्त डॉ.कैलास शिंदे यांनी सायक्लोथॉनमध्ये (NSG Cyclothon ) सहभागी होत मुंबईतून गेट वे ऑफ इंडियापासून सुरूवात करून नवी मुंबईतील ज्वेल ऑफ नवी मुंबई हे 40 किमीचे अंतर 1 तास 31 मिनीटात पार केले.
यावेळी बोलताना आयुक्त डॉ.कैलास शिंदे यांनी शहीद जवानांना आदरांजली अर्पण करताना त्यासोबतच गर्भाशयाच्या कर्करोगाविषयी जनजागृती करण्याचा आरोग्यहिताय उपक्रम राबविणे ही फार मोठी लोकहिताची गोष्ट असून त्याबद्दल कर्नल अभिषेक सिंह आणि त्यांच्या राष्ट्रीय सुरक्षा दलातील सहका-यांची प्रशंसा केली.
सध्या बदलत्या जीवनशैलीत कर्करोगाचे प्रमाण वाढलेले दिसत असून त्यातून बचावासाठी लवकर निदान होणे हाच सर्वोत्तम पर्याय असल्याचे ते म्हणाले. त्यादृष्टीने महिलांमधील कर्करोगाचे वाढते प्रमाण चिंताजनक असून याकरिता नवी मुंबई महानगरपालिकेने सगळ्या रूग्णालयांमध्ये व काही नागरी आरोग्य केंद्रांमध्ये 14 ठिकाणी आठवड्यातून 2 दिवस मंगळवार व शुक्रवारी मास स्क्रीनींग सुरू केले आहे.
यावेळी महानगरपालिकेचे वैद्यकीय आरोग्य अधिकारी डॉ.प्रशांत जवादे, उपआयुक्त डॉ.अजय गडदे व डॉ.अमोल पालवे तसेच सायक्लोथॉनमध्ये सहभागी राष्ट्रीय सुरक्षा दलाचे जवान, पोलीस व नागरिक आणि एनएसएसचे विद्यार्थी मोठ्या संख्येने उपस्थित होते. या उपक्रमाद्वारे महिलांमधील गर्भाशयाच्या कर्करोगाविषयी जनजागृती करून, नियमित आरोग्य तपासणीचे महत्त्व अधोरेखित करण्यात आले.
——————————————————————————————————
