शिक्षण विभागाच्या हस्तक्षेपामुळे विद्यार्थिनीला दिलासा
नवी मुंबई, 3 मार्च 2017/AV News Bureau:
फी माफ केलेली असतानाही शाळेच्या कर्मचाऱ्यांकडून नजरचुकीने अधिक फी घेतल्याचे स्पष्ट करीत रेयॉन इंटरनॅशनल शाळेने दिलगिरी व्यक्त केली आहे. याप्रकरणी जाब विचारल्यानंतर पुढील शैक्षणिक वर्षात पिडित विद्यार्थिनीला फीमध्ये सवलत देण्यात येईल, असे लेखी पत्र शाळा प्रशासनाने नवी मुंबई महापालिकेच्या शिक्षण विभागाला दिले आहे.
सानपाडा येथील रेयान इंटरनॅशनल शाळेत पाचवीमध्ये शिकणाऱ्या एका विद्यार्थिनीला 25 टक्के ट्युशन फी माफ करण्यात आली. मात्र तरीही तिच्याकडून फी आकारली गेल्याचा प्रकार उघडकीस आला. याप्रकरणी सदर विद्यार्थिनीच्या पालकांनी शाळा व्यवस्थापनाकडे 16 फेब्रुवारी रोजी तक्रार केली. याबाबतची तक्रार मिळाल्यानंतर शिक्षण विभागानेही रेयान इंटरनॅशनल शाळा व्यवस्थापनाकडे जाब विचारला. त्यावर सूचना देवूनही फी घेणाऱ्या स्टाफकडून नजरचुकीने या विद्यार्थिनीची फी घेण्यात आल्याचे शाळा व्यवस्थापनाने सांगतिले. तसेच याप्रकारामुळे विद्यार्थिनीला झालेला मनस्ताप तसेच आर्थिक नुकसानीबाबत शाळा व्यवस्थापनाने दिलगिरी व्यक्त केली. सदर विद्यार्थिनीला सन 2017-18 च्या शैक्षणिक वर्षात फी माफी देण्यात येईल, असे लेखी आश्वासन शाळा व्यवस्थापनाने दिल्याची माहिती शिक्षणाधिकारी संदीप संगवे यांनी दिली.
