काँग्रेसच्या सचिन सावंत यांची मागणी
मुंबई, 3 मार्च 2017/AV News Bureau:
राज्यात विविध ठिकाणी कोट्यवधींच्या चलनातून रद्द केलेल्या जुन्या नोटा जप्त करण्यात आल्या आहेत. यावरून राज्यभरात कमिशन घेऊन नोटा बदलून देण्याचा धंदा सुरू असल्याचा आरोप करीत याप्रकरणी सीबीआयद्वारे चौकशी करावी, अशी मागणी काँग्रेसचे सरचिटणीस सचिन सावंत यांनी केली आहे.
ठाणे शहरातील तीन वेगवेगळ्या घटनांमध्ये 2 कोटी 25 लाक रुपयांच्या जुन्या नोटा जप्त करण्यात आल्या आहेत. तर पुण्यातील पिंपरीतही चलनातून बाद झालेल्या नोटांची 1 कोटी 36 लाख 26 हजार रुपयांची रोकड घेऊन जाणाऱ्या तिघांना पोलिसांनी ताब्यात घेतले. गेल्या काही दिवसात राज्यभरातून मोठ्या प्रमाणात अशा घटना समोर आल्या आहेत. सरकारने जुन्या नोटा बाळगण्यावर बंदी घातलेली आहे तसेच केवळ अनिवासी भारतीयांना रिझर्व्ह बॅकेमधून नोटा बदलण्याची परवानगी आहे. तरीही कमिशन घेऊन नोटा बदलून देण्याचा धंदा राज्यात सुरू असल्याचा आरोप सावंत यांनी केला आहे.
