मुंबई,4 एप्रिल 2017/AV News Bureau:
ज्येष्ठ शास्रीय गायिका किशोरी आमोणकर (वय 84) यांचे सोमवारी रात्री प्रभावीदेवी येथील राहत्या घरी निधन झाले. गायनक्षेत्रातील भरीव योगदानामुळे त्यांना गानसरस्वती असे म्हटले जाते. पद्मभूषण, पद्मविभूषण या नागरी सन्मानांनी त्यांना गौरविण्यात आले होते. याशिवाय संगीत नाटक अकादमीच्या पुरस्कारानेदेखील त्यांना सन्मानित करण्यात आले होते. त्यांच्या पश्चात दोन मुले, सुना आणि नातवंडे असा परिवार आहे. मंगळवारी संध्याकाळी शिवाजी पार्क येथे अंत्यविधीसाठी त्यांचे पार्थिव आणण्याची शक्यता आहे.
किशोरीताईंचा जन्म 10 एप्रिल 1932 रोजी मुंबईत झाला. प्रख्यात गायिका मोगूबाई कुर्डीकर या त्यांच्या मातोश्री तर वडील माधवदास भाटिया. किशोरीताईंनी आपल्या आईकडून संगीताचे ज्ञान तर घेतलेच, शिवाय विविध संगीत घराण्यांच्या गुरूंकडूनही मार्गदर्शन घेतले. त्या मुंबईच्या एलफिन्स्टन कॉलेजमध्ये शिकल्या. त्यांचे पती रवी आमोणकर हे अध्यापन क्षेत्रात होते.
१९५० चे दरम्यान किशोरीताईंनी आपल्या व्यावसायिक कारकीर्दीस प्रारंभ केला. हिंदी चित्रपट ‘गीत गाया पत्थरोंने’ (सन १९६४) साठी त्यांनी पार्श्वगायन केले . तर 1991 मध्ये ‘दृष्टी’ ह्या हिंदी चित्रपटाचे संगीत दिग्दर्शनही केले. मात्र किशोरीताई त्यांच्या शास्त्रीय तसेच उपशास्त्रीय गायनासाठीच अधिक प्रसिद्ध आहेत. ख्याल गायकी बरोबरच त्या ठुमरी, भजन इत्यादी गायन प्रकारांना प्रभावीपणे सादर करत. हिंदुस्तानी शास्त्रीय संगीत गायिका असून जयपूर घराण्याच्या शैलीत गायन करीत होत्या.
संगीत क्षेत्रातील किशोरीताईंच्या भरीव योगदानामुळे त्यांना अनेक पुरस्कारांनी सन्मानित करण्यात आले.
- संगीत नाटक अकादमी पुरस्कार, इ.स. 1985
- पद्मभूषण पुरस्कार, इ.स. 1987
- संगीत सम्राज्ञी पुरस्कार, इ.स. 1997
- पद्मविभूषण पुरस्कार, इ.स. 2002
- संगीत संशोधन अकादमी पुरस्कार, इ.स. 2002
- संगीत नाटक अकादमी फेलोशिप, इ.स. 2010
