- अविरत वाटचाल न्यूज नेटवर्क
- नवी मुंबई, ७ जुलै २०२०
केवळ २० दिवसात वाशीतील सिडको एक्झिबिशन सेंटर मध्ये उभारण्यात आलेल्या १ हजार १८३ बेड्स क्षमतेच्या कोव्हिड रुग्णालयामध्ये ४८३ ऑक्सिजन बेड्सची सुविधा करण्यात आलेली आहे. या बेड्सना तातडीची गरज म्हणून ऑक्सीजन सिलेंडरद्वारे पुरवठा केला जात होता. मात्र यामध्ये अधिक सुधारणा करीत रुग्णांना ऑक्सिजनचा पुरवठा समान दाबाने मिळावा यादृष्टीने महापालिका आयुक्त अण्णासाहेब मिसाळ यांच्या संकल्पनेतून याठिकाणी ऑक्सिजन पुरवठ्यासाठी पाईपलाईन बसविण्यात आली असून लिक्विड ऑक्सीजन प्लान्ट उभारला आहे. हे काम जवळजवळ पूर्ण झालेले असून सोमवारी आयुक्तांनी या सर्व कामाची पाहणी केली. बुधवारपासून हा ऑक्सीजन प्लांट कार्यान्वित होऊन याव्दारे रुग्णांना अधिक चांगली सुविधा उपलब्ध होईल असा विश्वास आयुक्त मिसाळ यांनी व्यक्त केला.
सिडको एक्झिबिशन सेंटर येथे ७५ आयसीयू बेड्सची व्यवस्था करण्यात येत असून सानपाडा येथील एमजीएम रुग्णालयातही ७५ आयसीयू बेड्सची व्यवस्था करण्यात येत आहे. या दोन्ही ठिकाणी भेट देऊन आयुक्तांनी कामांची पाहणी केली. साधारणत: १० ते १५ दिवसांमध्ये १५० आयसीयू बेड्स रुग्णांसाठी उपलब्ध होतील असे आयुक्तांनी यावेळी सांगितले.
- कोव्हीड रूग्णांशी आयुक्तांनी साधला संवाद
सिडको एक्झिबिशन सेंटर पाहणी दौऱ्याप्रसंगी आयुक्त अण्णासाहेब मिसाळ यांनी पब्लिक अॅड्रस सिस्टिम वरून रुग्णांशी थेट सुसंवाद साधला. यामध्ये त्यांनी त्या ठिकाणची आरोग्य तपासणी तसेच देण्यात येणाऱ्या जेवण आणि इतर सुविधांबाबत रुग्णांना विचारणा केली, तेव्हा सर्व रुग्णांनी हात उंचावून, टाळ्या वाजवून प्रतिसाद दिला आणि महानगरपालिकेची व्यवस्था चांगली असल्याचे अभिप्राय व्यक्त केले.
=======================================================
- इतर बातम्यांचाही मागोवा
