- अविरत वाटचाल न्यूज नेटवर्क
- नवी मुंबई, 6 एप्रिल 2026
नवी मुंबई महापालिकेत प्रतिनियुक्तीवर बरेच अधिकारी आलेले असून सत्ताधारी नगरसेवकांनी त्यांच्याविरोधात आक्रमक भूमिका घेतली आहे. त्यातच सचिवपदाचा कार्यभार सांभाळणाऱ्या अधिकारी संघरत्ना खिल्लारे यांचा प्रतिनियुक्तीवरील कार्यकाळ २६ मार्च २०२६ रोजीच संपल्याची माहिती सर्वसाधारण सभेत लेखी स्वरुपात देण्यात आली. सदर अधिकाऱ्याची पुन्हा मूळ ठिकाणी रवानगी करण्याबाबतची फाईल आयुक्तांना सादरही करण्यात आली आहे. मात्र आयुक्तांनी अद्याप याबाबत कोणताही निर्णय घेतला नसल्यामुळे प्रतिनियुक्तीवरील अधिकाऱ्यांच्या मुद्यावर सत्ताधारी नगरसेवक पुन्हा आक्रमक होण्याची शक्यता वर्तविली जात आहे.
क्लिक करा : महिला पत्रकारांसाठी विशेष आरोग्य शिबिराचे आयोजन
महापालिका सचिव चित्रा बाविस्कर यांच्या निवृत्तीनंतर रिक्त झालेल्या सचिवपदाची तात्पुरती जबाबदारी शिक्षण विभागाच्या उपायुक्त संघरत्ना खिल्लारे यांच्यावर सोपविण्यात आली.
सचिवपदाचा तात्पुरता कार्यभार सांभाळणाऱ्या उपायुक्त खिल्लारे यांचा प्रतिनियुक्तीवरील नवी मुंबई महापालिकेतील कार्यकाळ २६ मार्च रोजी संपल्याची माहिती नगरसेवक सुरज पाटील यांनी लेखी स्वरुपात महासभेमध्ये दिली. मात्र आता एप्रिल महीना उजाडला असून प्रतिनियुक्तीवरील एकही अधिकारी आपल्या मूळ विभागात परत गेलेला नाही. महापालिकेत सध्या अधिकाऱ्यांची कमतरता आहे. त्यामुळे कालावधी पूर्ण झाला असला तरी प्रतिनियुक्तीवरील अधिकाऱ्यांकडे कामकाज सोपविण्यात आल्याचे बोलले जात आहे. त्यामुळे प्रतिनियुक्तीवरील अधिकाऱ्यांबाबत सत्ताधारी पक्ष काय भूमिका घेणार तसेच महापालिका आयुक्त कोणता निर्णय घेणार याकडे आता लक्ष लागले आहे.
========================================================
