देशात यंदा सरासरी 98 टक्के पाऊस
नवी दिल्ली, 6 जून 2017:
देशात यंदा सरासरी 98 टक्के पाऊस पडेल, असा अंदाज भारतीय हवामान खात्याने आज वर्तविला आहे. अल निनो हवामानाचे प्रमाण कमी झाल्यामुळे पावसाची टक्केवारी वाढण्याची शक्यता असून मुंबईत मोसमी पाऊस 13 जूनपर्यंत दाखल होईल, असाअंदाज हवामान खात्याने वर्तविला आहे.
मोसमी पावसाच्या पहिल्या टप्प्यात म्हणजे जून ते सप्टेंबर या काळात मध्य भारतात शंभर टक्के पाऊस हजेरी लावेल तर ईशान्य भारतात हेच प्रमाण 96 टक्के राहील. पावसाचे हे प्रमाण जुलै महिन्यात 96 क्के आणि ऑगस्ट महिन्यात हेच प्रमाण 99 टक्क्यांपर्यंत पोहोचेल, असेही हवामान खात्याने स्पष्ट केले आहे.
यंदा मोसमी पाऊस समाधानकारक होणार असल्याचे हवामान खात्याने जाहीर केल्यामुळे शेतकरी वर्ग कामाला लागला आहे.
दरम्यान, केरळमध्ये मोसमी पावसाने हजेरी लावली आहे. त्यानंतर पावसाचा वेग काहीसा मंदावला आहे. 5 जूनपर्यंत मॉन्सून कर्नाटकमध्ये दाखल होण्याची शक्यता होती. मात्र आता थोडा उशीर झाल्यामुळे मॉन्सूनची पुढची वाटचालही थोडी लांबणीवर पडली असून 13 ते 15 जूनपर्यंत पाऊस मुंबईसह इतर भागांतही सक्रीय होण्याची शक्यता वर्तविण्यात येत आहे.
